 |
| पालबाट प्रसारण गर्दै रेडियो भीमेश्वर |
गत बैशाख १२ गतेको महाभुकम्प र २९ गतेको शक्तिशाली पराकम्पनले सदरमुकाम चरिकोटका ४ ओटै सामुदायिक रेडियोका भवनहरुमा क्षती पुगेपछि रेडियोहरुले पालबाट कठिन तरिकाले प्रसारण थालेका हुन् । जिल्लाबाट प्रकाशन हुने पत्रपत्रिकाले
भने भुकम्पपछि प्रकाशन शुरु गर्न सकेका छैनन् ।
महाभुकम्पले क्षतीग्रस्त बनेका रेडियोका भवनहरुबाट निकालिएका उपकरण सदरमुकाम चरिकोट स्थित चरिघ्याङ क्षेत्रमा खुल्ला स्थानमा टाँगिएका पालहरुमा राखेर कामचलाउ ढंगले प्रसारण गर्नुपरेको रेडियोकर्मीहरुले बताएका छन् । महाभुकम्पले रेडियोहरुका उपकरणमा क्षती पुर्याएको छ । महाभुकम्प पछि दोलखालाई केन्द्रविन्दु बनाएर लगातार पराकम्पन गईरहेका कारण पालमै बसेर रेडियो चलाईरहेका रेडियोकर्मी मानसिक रुपमा त्रसित बन्ने गरेका छन् ।
 |
| पालबाट प्रसारण गर्दै रेडियो शैलुङका रेडियोकर्मी |
यस्तै जिल्लाकै पहिलो सामुदायिक रेडियो कालिञ्चोक एफ एम समेत रेडियो स्टेशन नजिकको खुल्ला स्थानमा पाल टाँगेर सचालन भइरहेको छ । "सबै रेडियोकर्मी साथीहरु पाल भित्रै बस्छौँ, त्यही खाना खान्छौ र त्यही पालबाट जनतालाई सुसूचित गरिरहेका छौँ" रेडियोका स्टेशन म्यानेजर जीवन लामाले भने । महाभुकम्पले कालिञ्चोक एफ एमका उपकरणहरुमा क्षती पुर्याएका कारण यो रेडियो १२ गतेको भुकम्प पछि केही दिन बन्द हुन पुगेको थियो । यस्तै शैलुङ एफ स्टेशन नजिक रहेको एउटा पार्टी प्यालेसको प्रांगणमा पाल टाँगेर प्रसारण भईरहेको छ । सबै रेडियोकर्मीहरु एउटै पालमुनी कष्टकर तरिकाले बसेर प्रसारण गरिरहनुपरेको स्टेशन म्यानेजर रामचन्द्र गिरीले जानकारी दिए ।
चरिघ्याङ गुम्बा नजिक रहेको रेडियो भीमेश्वर स्टेशन भवनबाट नजिक एउटा रिसोर्टको पार्किङ मैदानमा सरेर प्रसारण थालेको छ । यसमा समेत रेडियोकर्मीहरु पालमुनी बसेर काम गरिरहेका छन् । रेडियोका ब्याकप नभएका कारण बत्तीको भर पर्नु परेको र बत्ती जाँदा रेडियो सञ्चालन गर्न नसकिएको भीमेश्वर रेडियोका समाचार संयोजक लालकुमार मोक्तानले बताए । एकोर्याबका केन्द्रिय सदस्य खड्काले जिल्लाका सबै रेडियोहरुका स्टुडियो र उपकरणहरुमा क्षती पुगेको बताए ।
यस्तै महाभुकम्प पछि जिल्लाका कुनै पनि पत्रपत्रिकाहरु प्रकाशनमा आउन सकेका छैनन् । कार्यालय रहेको भवनमा क्षती पुगेको र छापाखानाहरु सचालनमा आउन नसकेका कारण पत्रपत्रिका प्रकाशन गर्न नसकिएको नवतरङ साप्ताहिकका प्रकाशक राजनबहादुर शिवाकोटीले जानकारी दिए । जिल्लामा ४ ओटा पत्रिका नियमित रुपमा प्रकाशन हुदै आएका छन् ।
जिल्लाका रेडियोहरु महाभुकम्पले बन्द गराएका कारण क्षती पुगेपछि शुक्रबार प्रेस काउन्सिलका अध्यक्ष बोर्णबहादुर कार्की र पत्रकार महासंघ केन्द्रीय समितिको टोलीले जिल्लाका सञ्चारमाध्यमको स्थलगत निरीक्षण गरेको छ । रेडियोहरुको नियमित प्रसारणका लागी तत्काल जेनेरेटर उपलब्ध गराउन अध्यक्ष कार्कीले प्रमुख जिल्ला अधिकारी प्रेमलाल लामिछानेलाई आग्रह गरेका छन् । शुक्रबार भुकम्पले पीडित बनेका जिल्लाका सञ्चारमाध्यम र पत्रकारहरुको अवस्था बारे जानकारी लिएपछि प्रमुख जिल्ला अधिकारी लामिछाने सगँको अन्तरक्रियामा उनले रेडियोहरुको नियमित प्रसारणका लागी पहल गर्न आग्रह गरेका हुन् । कार्की सगँको टोलीमा काउन्सील सदस्य किशोर श्रेष्ठ, पत्रकार महासंघका उपाध्यक्ष खिलाबहादुर भण्डारी, कोषाध्यक्ष सूर्यमणि गौतम लगायत थिए । शुक्रबार साँझ जिल्ला आईपुगेका एमाओवादी नेता नारायण काजी श्रेष्ठले समेत कष्टकर तरिकाले प्रसारण र्भैरहेका जिल्लाका सामुदायिक रेडियोहरुको स्थलगत निरीक्षण गरेका थिए ।
No comments:
Post a Comment