 |
| बैशाख २९ को भूकम्पमा परी घाइते भएकालाइ उद्धार गरी अस्पताल लग्दै विदेशी नागरिक |
दोलखा, २९ बैशाख/मंगलवार गएको भूकम्पमा परी दोलखामा ३४ जनाको ज्यान गएको छ भने मृतकको संख्या बढ्न सक्ने जिल्ला दैवी प्रकोप उद्धार समितिले बताएको छ ।
मंगलवार मध्यदिन गएको भूकम्पले दोलखा सदरमुकाम चरिकोटका अधिकांश पक्की भवनहरुसमेत भत्किएका कारण सदरमुकाममा मात्रै
करिब एक दर्जन मानिसहरुको ज्यान गएको हो । भूकम्पले एक सय भन्दा बढी मानिसहरु घाइते भएका छन् भने १२ गम्भीर घाइते भएका १२ जनालाई थप उपचारका लागि काठमाडौँ लगिएको छ ।
 |
| दोलखाको पाखलती बजारमा आफ्नो घरटहरो भत्किएपछि सामान निकाल्दै स्थानीय |
सदरमुकाम चरिकोटस्थित चरिघ्याङमा रहेको होटल प्याराडाइज ढल्दा त्यसले किचेर रुकु थापा र सिर्जना थापाको मृत्यु भएको छ । होटल प्याराडाइजले अन्य केही मानिसहरुलाई किचेको हुन सक्ने आशंका गरिएको छ । त्यससँगै एक दर्जन होटलहरुको भवन पूर्ण रुपमा क्षति भएको छ भने अधिकांश होटल तथा पक्की भवनहरुमा समेत क्षति भएको छ ।
दोलखाको ऐतिहासिक दोलखा सहरमा अघिल्लो भूकम्पले चर्काएका पुराना तथा नयाँ अधिकांश भवनहरु ध्वस्त भएका छन् । दोलखा सहरमा रहेको त्रिपुरासुन्दरीको मन्दिर पूर्ण रुपमा क्षति भएको छ भने अघिल्लो भूकम्पबाट जोगिएको दोलखा भीमेश्वरको मन्दिरमा सामान्य क्षति भएको छ । दोलखा भीमेश्वरको गहनाआदि राखिने गरेको भण्डार घर पनि पूर्ण रुपमा क्षति भएको छ ।
सदरमुकाम चरिकोटबाट लामाबगर जाने बाटो भोर्लेमा भत्किएपछि यातायात अवरुद्ध भएको छ । त्यसैगरी चरिकोटबाट रामेछाप जाने सडक भीरकोटमा पहिरोले भत्किँदा यातायात अवरुद्ध भएको छ । भूकम्पका कारण ठाउँठाउँमा गएको पहिरोले थप धनजनको क्षति भएको हुनसक्ने अनुमान गरिएको छ ।
 |
| दोलखाको पाखलती बजारमा आफ्नो घरटहरो भत्किएपछि सामान निकाल्दै स्थानीय |
बैशाख १२ र १३ गते गएको विनासकारी भूकम्पले दोलखामा ७८ जनाको ज्यान लिएको थियो ।
No comments:
Post a Comment